如果一个影展，出席嘉宾有Johnny Depp，Nicholas Cage，法国影后Juliette Binoche，Isabelle Huppert，印度良心Aamir Khan，“诬网”丹麦男星Mads Mikkelsen出席，怕且都叫得上国际级数影展，娱乐版点都有啲报导或者行红地毡慨相啩？

难道系小编太后知后觉？竟然要到闭幕日，先发现原来有个星光熠熠巨星如云慨电影节发生咗，但我上网搵嚟搵去啲报导真系寥寥可数，连「中国版IMDB」时光网，都只系搵到3条新闻。

呢个咁多星光但又无咩报导慨，系寻日闭幕慨「第一届海南岛电影节」。内地影视业蓬勃，电影票房亿亿声，有大大小小影视展其实唔出奇。再百度一下「海南岛电影节」，原来系国家主办，支持海南岛成为自由贸易区云云，难怪咁有财力请到咁多国际巨星。开头提过嗰班以外，仲有我地熟悉慨郭富城，惠英红，赵薇，苏有朋，王力宏，姚晨都有出席，目标似乎系要成为国际级影展。

多一个影展，多一个影视业界平台，又得到政府支持，再配合海南岛沙滩美境，想打造成中国版康城影展，理论上对业界有百利无一害。奇就奇在影展为期7日，应该有放映唔少电影，但搵嚟搵去都见唔到全个片单（当然，因为都搵唔到官方网站），净系搵到好多零碎资料︰有「大师嘉年华」活动，同 Isabelle Huppert，Aamir Kahn等人对谈。

仲有好多影星出席，喺海边影咗相...同颁奖，话说影展有个「华语荣誉推选单元」，奖项分别有年度影片，男女主角，男女配角，年度编剧，新导演及年度动画等。

单元奖项以“我不是药神”为大赢家，其余得奖电影有“红海行动”，“无双”，“找到你”等，似乎只限内地电影参加，但得奖名单尚算合理。

搞得电影节都系旨在推广电影，特别系非商业类同艺术电影，不过喺内地拍剧或者电影，剧本都一定要过到审查，敏感题材一律唔批。影展选片名单一定受限制，做唔到多元只系得星光慨影展，又可以玩几多届呢？

首届海南电影节出席慨国际影星都系影展常客，难得都系演技派而唔系「流量小花/小鲜肉」，仲搞埋「大师班」，都算落足心机同诚意。唯有留意住未来海南岛电影节慨发展，希望唔会沦为一堆俾钱就入得慨把鬼电影活动。