【盘房来料】长毛50股已无翻身机会
美股系强到你唔信，虽然侵侵喺中东点着火头，又话要诛杀金仔，兼且今晚又话政府莫财，随时暂停运作，但系美股调整咗两三日，隔晚又回升，带动港股今日再反弹。
港股㖊日一度下试100日线，成功寻找支持后，今日承接外围股市回升高开，恒指高开96点后，虽然曾收窄升幅低见28344点，其后愈战愈勇，愈弹愈高，半日收市前最多升274点，高见28578点，中午报收28550点；国指升127点，报收11278点，少咗阿爷阻头阻势，系弹得轻松啲，唔似得㖊日A股死死吓，搞到港股弹唔起。其实阿Man都讲过，恒指牛证周三被杀得七七八八，大户基本上开咗大餐，严重超卖下反弹好正常。
重磅股普遍反弹，腾讯(00700)㓥完一大批肥牛，终于识得反弹，今日再升2.6%，报收388.4元，短线反弹阻力喺392元，反弹期望勿过高。至于其他科技股有龙头大哥射住，跌咗咁多梗要弹，瑞声(02018)曾升7.6%，半日升5.7%；舜宇(02382)曾升5.8%，半日升4%。其他科技股亦录得不俗反弹升幅，不过睇番之前急跌慨累积跌幅，今日反弹相对湿湿碎。同样道理，内房股一样反弹，但反弹幅度同样比较累积跌幅系碎料。
港股反弹可以去到几多无人知，但阿Man相信依家只系反弹，而唔系见底回升，大市一日唔企稳喺50日线(约28750)再筑底，要再破顶唔容易。反而今次反弹唔升穿50日线的话，仍然会再之回落，问题系100日(约28150)已有支持，抑或再插深啲。最重要系大户喺28800点楼上计数离场，又点会喺同一水平再入场，至少等到下个月踏入新一年度先再开仓。加上下星期美国议息，一旦港元随后加息，大户要有借口再开杀戒。
唔少粉丝问阿Man，若然大市要整固或再调整，二三线股仔仲有冇机会落吓镬，话晒2017年全年无佢哋份，下个升浪点到轮到股仔玩。阿Man可以好肯定咁答大家，自今年中‘粉尘爆炸’后，已经判咗啲股仔死刑，监管机构对相关股份穷追猛打，吓吓出动红牌赶出场，更甚者直情DQ公司强制除牌。再加埋㖊日发生康宏(01019)集团高层被ICAC拘捕一事，即系监管机构已掌握佢哋口中慨邪恶集团慨犯罪证据，并已转介执法机构做嘢，咁慨环境同气氛之下，个个庄家都怕枪打出头鸟，仲边会够胆入场炒股仔。若然仲有股仔持仓，都系早日分手，唔好再望之后会有机会翻身。
麦狄文
(徐狄怡‧证监会持牌人)
