【盘房来料】港股生死边沿还看50日线
美股喺议息同周五三重期结算前，蛇咬都唔郁住，即使隔晚纽约发生恐袭一样无有怕，隔晚三大指数上升，只可惜港股跟啲唔跟啲，今早上过去又畀内地股市拖低，未能企稳10日线(28882点)，都唔使旨意挑战20日线(29195点)，更遑论回补下跌裂口29353-29563。
今日恒指略为高开，曾升101点，见29066点半日高位即掉头回落，内地股市一脚软，港股即转弱，一度倒跌196点，低见28769点，50日线失守，目前又喺50日线争持，半日报收28832点，跌132点。国指则跌82点，报收11349点。
讲到底恒指等于腾指，腾讯(00700)掂，港股上，腾讯瓜，港股死。腾讯连弹三日后，今日有啲脚软，早段曾升至410.8元，刚好系下跌裂口顶部就回头，揾把尺度都无咁准。完成回补裂口未企稳又调头，仲要再失下跌裂口底部405.8元，目前喺400元水平争持，半日收399.2元，跌1.5%或6.2元。当然腾讯今日慨走势唔多好睇，不过反弹咗几日，喺400元水平整固好正常，只要唔再失390元，腾讯仲有得谂。
至于另一强势反弹慨平保(02318)，今日回落至80元水平之下，刚好反弹至82元另一阻力回头，但能守住78元，又唔衰得去边。究竟家阵个市系成功寻底后整固，抑或反弹结束再回落，目前仍然系五五波，大市又喺50日线争持，可以话系生死边沿之间，总之守得住条50日线都唔死得，不过要精神爽利，当然要迅速回补下跌裂口并企稳。
有平保撑腰慨大笨象(00005)，日前变身小飞象后，今日表现亦甚为硬朗，只可惜80元呢个位唔系咁易突破，睇嚟又要喺78至79元稍作整固再储力。至数最难睇慨板块，非手机设备股莫属。舜宇(02382)成为蓝筹后，似乎冇乜好日子过，加上上月手机镜头出货量按月下跌，半日跌近7%，成为最弱蓝筹。而瑞声(02018)亦有秩序下跌，半日又跌3.7%，其他手设股跌幅闲闲地2%以上，好明显资金已撇甩呢个板块。
医药股喺第四季愈战愈勇，阿Man曾推介慨医药股高处未算高，提防急升过后有震荡，㖊日急升逾一成慨金斯瑞生物(01548)早段曾跌7%，半日跌1.3%，心血少啲都坐唔定。濠赌股同样创新高后脚软，暂时唔可以话转势要跌，但急升过后回吐好正常，只要唔跌穿上一个交易日低位，仍然可以持有。
麦狄文
(徐狄怡‧证监会持牌人)
