【轮证赢家】小心驶得万年船
㖊日恒指又一鼓作气咁向上冲，连条10天线都破埋；今朝早见个市都系绿色(港股绿色是升市咁解呀)，但到依家10点18分，恒指都仲系升紧，做紧28880点，不过日线图上呈“十字星”，最低暂时做过28707点，喺条10天线(28804点)穿梭跑，似乎有啲唔稳定慨感觉。
见到近日坊间有报道话恒指由11月22日下行至上周四(12月7日)见反弹，认为今次慨调整已经完成，大市即将重拾升轨；就算你开恒指牛熊证街货图睇，依家10点26分，恒指升幅扩大至109点，报28903 点，用呢口价度上个图慨话，上方最贴价慨熊证(29000至29099点)同现价相差100点都无，呢度有相当于546张期指；再上多100点，即系踩到上29100至29199点呢个范围慨话，就可以食多659张期指，total都有成1205张期指架。
至于下方慨牛证…我谂班牧牛人带住啲牛仔上到山顶去放牛食草咁滞，最贴价慨牛证喺28700至28799点，同现价有203点差距，“咁都未至于上到山顶呀！”，系，但呢度得嗰66张期指咋㖞，之后嗰三个100点慨范围系空城嚟架㖞，第二有货慨恒指牛证喺28300至28399点，呢度都先得163张期指，讲紧最重货慨牛证就28000至28099点，同现价都有逾900点慨距离，唔喺山顶咁你话系边啦。
“如是者用牛证向上追杀熊证咪啱啰？”从恒指牛熊证街货图嚟讲的确系咁数，不过从日线图上又系另一回事。10天线同50天线(28825点)愈嚟愈行得埋就大家都知啦，一个唔该“做错事”整咗件“死亡交叉”出嚟慨话就麻烦啦；“死亡交叉 ”出现都算啦，你睇条DMI先啦，恒指由上周四到依家所谓慨“调整完成”以嚟，DMI慨+DI至今都未有一日系高走于-DI；仲有，SlowSTC(14,3)%K线同%D线差距又开始收窄(见表)。
假如汇控(00005)继续向前冲带恒指再上，上到20天线(29197点)又即系保历加通道中轴，系另一个关口，用番头先mark出嚟个现价计，其实同20天线相差294点，用只现价牛去食埋呢294点？进取慨的确可以咁做，但小心技术指标随时话你知个市可能要屈番转头，那怕个市向下行100、200点看以比较细慨点数，不过唔好忘记，今次个水位就可能只系现价同20天线慨差距咋；年尾流流，各位读者，小心驶得万年船呀！
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
放大图片
