【盘房来料】再失20日线反弹或完结
讲咗十万九千七百次，港股一直喺生死边沿，一定要睇实29200呢一关，㖊日恒指报收29166已经响起警号，加上内地股市仲系样衰衰，只要美股有乜闪失，港股反弹随时终止，结果隔晚美股一脚软，港股今早即裂口低开。
恒指今日低开166点，开市后都冇乜点弹，最高都系29018点，其后内地股市愈压愈低，港股跌幅亦扩大，失守二万九关后拾级而下，最多跌363点，低见28803点，勉强守住28800点，中午报收28833点，险守10日线(28812点)，但20日线(29201点)一失已去到沙头角咁远，50日线(28855点)则接近10日线。国指报收11353点，跌177点，10日线(11375点点)都已失守。再失29200水平，可能反弹已告一段落，话咗一日唔回补下跌裂口企稳，大市仍反复，要唔要再试上次低位又未必，可能呢个月余下时间就喺28600-29400之间上落。
金融股喺美国联储局加息后，好似放完烟花咁玩完，㖊日回吐跌有限，今日坚插，建行(00939)及工行跌幅超过1%。另外两只重磅金融股大笨象(00005)同平保(02318)亦分别跌1.1%及1.5%。㖊日两股唔能够企稳80元已经有啲棘手，今日再回，平保睇住条10日线(77.6)，大笨象要望住78元不能失。
内房股讲咗纯属反弹，切忌谂多咗，融创(01918)趁反弹配股，今日一开市已见裂口，暂时守住配股价，但已拖累整个内房板块弹完又散过，只有合景泰富(01813)因上月预售额按年劲升一个开，股价逆市升2.2%，追货唔好问，反而谂吓仲有货要唔要借机遁。
话咗濠赌股呢期最劲，虽然今朝唔少濠赌股跟市跌，但大部分已收复失地甚至逆市上升，呢个板块坚持坐定定，有钱剩。另一强势板块医药股今日脚软，要好似关心男女朋友咁到实，一旦走势逆转，先套利松人。
呢期北水喺科技股插水之际，仍然起势咁买中芯国际(00981)，中芯国际半日逆市升2.7%，两名主要股东行使优先认购权，即系话呢啲位睇好先行使，而中芯喺股价14元调整至最低10元，可能已完成调整，可以吼位跟大户11附近上车。另一只半导体股ASM太平洋(00522)逆市上升2.6%，目前又系接近呢两个月低位，不过吼位103元楼下揾位上车，跌穿100元止蚀，博佢弹番上110元。
麦狄文
(徐狄怡‧证监会持牌人)
