【盘房来料】美股强A股弱港股唔上又唔落
花旗税改方案终点在望，国会已就方案达成协议，家吓只差侵侵签番只龟去就大功告成。美股上周五再升，反映市场对税改方案有一定期望，除咗减税有助企业盈利增加，亦希望减税可刺激经济，抵销QE完结后，收水或对经济带嚟慨冲击，一招税改，百利无一害。至于港股表现较为反复，其实都系阿Man预计之内。
恒指今早高开后曾倒跌26点，见过28821点半日低位，其后一度升241点，高见29089点半日高位，可惜内地股市继续脚软，阻碍港股再向上发展，半日收市前大市喺二万九附近争持。恒指中午报收29001点，升153点；国指则升42点，报收11408点。
其实若非内地股市阻头阻势，港股反弹应可再重上29200点水平，再一次挑战20日线(29189点)，但偏偏内地股市疲弱，令大市不停喺10日线(28800点)同50日线(28869点)附近穿梳上落。估计系圣诞长假期前，大市继续玩上落，恒指波幅大概28600至29400点不变，反正都年结收炉在即，阿Man维持四五成仓位不变，只会食住花生做观众。
金融股回吐过后今日回升，其实加息对金融股系好事，大户喺上月底已开始换马，沽出科技股获利，换入金融股，阿Man认为呢个趋势会延续至2018年。纳指创新高，腾讯(00700)反弹，暂时400元系短线阻力，而380元支持强劲，甚至10日线(389)附近，已有买盘急不及待上车。睇番上周北水资金流，已见腾讯慨北水盘由之前净流出，变番净流入，暂时腾讯要喺380-400元水平进行整固，缸边友短炒就睇住呢十几廿蚊玩上落。
圣诞钟，炒汇丰，今年呢枝歌仔又响起，不过大笨象(00005)动力始终唔够啲新经济股咁劲，买大笨象要有耐性坐，咪以为可以一头半个月劲赢一两成。至于平保(02318)阿Man一直都睇好，暂时喺78元水平开始整固，但中长线要重见85元楼上高位冇问题，至于明年有冇机会红底股，就要再睇吓平保分拆陆金所，有冇腾讯分拆阅文(00772)咁受市场欢迎。
手机设备股继续弱，以为舜宇(02382)点都保住红底股，谁知今日即失红底，舜宇呢个月沿途下跌，一直唔少粉丝问几时可以买番，而阿Man答案一直无变，已成跌势慨股票无谓自作聪明去估底，股价持续向下寻底，宁愿跌定反弹企稳买贵好过买错，道理同升穿顶慨股份唔去估顶一样。除咗舜宇，其他手机设备股全部仆直，其实自大市喺28200反弹以嚟，呢个板块一直反其道而行，深不见底完全唔识弹，只要有炒股经验，都知呢个板块暂时不宜沾手。
麦狄文
(徐狄怡‧证监会持牌人)
