【盘房来料】航空股继续跑赢大市
美股通过税放近尾声，侵侵慨政治路上赢出漂亮一仗，至于美股隔晚喺连创两日新高后抖抖，回吐压力唔算大，不过夜期同ADR就拖低咗，搞到港股今日都低开。
不过遇上港股系唔上唔落，反弹两日恒指今日早段低开，一度跌94点，见过29159点又回升，半日最多升72点，高见29326点，啱啱喺㖊日高位(29339点)前停落嚟，中午恒指报收29242点，跌10点；国指则跌18点，报收11523点。
重磅股同大市一样唔上又唔落，腾讯(00700)未能企稳400元大关，暂时继续整固，经过月初上演屠牛记之后，腾讯相关衍生工具开始归于平淡，暂时股价唔会有太大上落，今个月余下时间或者都系喺十元八块之间上落。至于大笨象(00005)未能企稳80元，又系需要时间整固一吓，只要守住77.8元楼上都唔差，始终金融股受惠加息，资金暂时唔会离开呢个板块。平保(02318)亦开始进入整固mode，股价喺80元附近上落，阿Man讲过中长线仍睇好平保，唔好太介意短线波幅。
上星期阿Man讲过年底系旅游旺季，航空股会再落镬，几架红色飞机呢期跑赢大市，仲齐齐创52周新高，已有货坐定定，继续let the profit run。除咗炒年底旅游旺季，市场亦憧憬航空业或成为下一批混改试点企业，航空股呢期可继续跑赢大市。至于阿Man整个第四季都睇好慨濠赌股，话咗回吐系吸纳好机会，㖊日回一回又系上车机会，今日整个板块又升过。银娱(00027)跟永利(01128)齐创三年新高，前者半日升0.5%，后者升0.%。金沙中国(01928)跟新濠国际(00200)追落后，半日前者升1.8%，后者则升1.8%。
除咗濠赌股，阿Man日前亦指出万洲(00288)受惠美国税改，兼且内需股近日跑赢大市，有机会再挑战之前高位，半日升1.3%，美中不足系未能成功升破前高位。至于其他内需股，以食品同饮品股表现较出色，旺旺(00151)半日升4.7%，华润啤酒(00291)半日升1.3%，创重组后新高。不妨留意逼近今年高位慨蒙牛乳业(02319)，喺买盘支持下，今年新高可期。
话咗手机设备股已成弃婴，短线反弹唔使恨，一于当睇佢唔倒，舜宇(02382)又失红底股，反弹过后半日跌1.8%，向下寻底之势未变，一日唔完成寻底横行，暂时唔急于上番车。丘钛(01478)加入最近配股潮，今早曾跌7%，半日跌4.1%报10.76元，现价仲低过配股价10.8元。
麦狄文
(徐狄怡‧证监会持牌人)
